Fylkesgeodataplan for Vestland

Verdien av samarbeid

Noreg digitalt er eit unikt, norsk samarbeid om felles innsamling, forvaltning og bruk av geodata. Når alle bidreg, er me betre rusta med gode kartdata. Det er nyttig i alt frå beredskap og evakuering via vegbygging og eigedomsutvikling til at søppelbilar og bodbilar finn fram.

Men Kartverkets statusrapport for kartdata viser at alt ikkje er roseraudt: Mange av Kartverkets system blir ramma av innsparingar, noko som gjer våre felles kartdata mindre oppdatert og anvendelege for brukarane. Viss matrikkelen ikkje er oppdatert, kan lokale styresmakter vedta planar som er ulovlege. Viss Nasjonalt register over luftfartshinder (NRL) ikkje har oppdatert informasjon, kan utfallet bli tragisk for redningshelikopter og beredskap.

Vestland fylke har krevjande terreng og røft klima. Ekstremvér kjem stadig oftare, og halvparten av alle skred i Noreg går i fylket vårt. Utfordrande infrastruktur med store avstandar, lang kystlinje, mange bruer og tunnelar, set store krav til gode geodata. Noreg digitalt-samarbeidet i Vestland fylke jobbar for å bygge ein geografisk infrastruktur som kan støtte arealforvaltning og beredskap i regionen.

Noreg digitalt og Kartverkets innsats gir store innsparingar for det offentlege og private næringslivet. Me vil ha orden i sakene – og me har ein plan. Me må berre ha hjelp med rammene og innsatsen lokalt.

Gjeldande plan vart vedteken av fylkesgeodatautvalet for Vestland 18. desember og regulerer Noreg digitalt-samarbeidet i fylket.

Planen består av to delar, og eventuelle vedlegg:

Fylkesgeodataplanen er eit strategisk dokument som beskriv aktivitetane det skal samarbeidast om i regionen dei neste fire åra.

Handlingsplanen (Excel-format) består av konkrete, realistiske og prioriterte mål og tiltak som skal følgja kursen sett i geodataplanen. Handlingsplanen blir revidert årleg.

Vedlegg: Kartleggingsplan Geovekst per desember 2025 (Excel-format) 

Planar som skal gjennomførast

Geodata skal bidra til godt kunnskapsgrunnlag for effektive avgjerdsprosessar. Geodataa skal vera lett tilgjengelege og brukarvennlege, i tillegg til godt dokumenterte, oppdaterte og med kjend nøyaktigheit og detaljeringsnivå.

Staten har ansvar for å samordna og koordinera arbeidet på nasjonalt nivå. Regionale og lokale aktørar må på si side ha arbeidsprosessar, rette verktøy, nok ressursar og kunnskap for å forvalta og bruka geografiske data i planlegging, tenester og beredskap.

Fire mål

Dette blir samanfatta i fire mål:

• Geodata skal vera lett tilgjengelege og brukarvennlege
• Geodata skal vera oppdaterte med dokumentert nøyaktigheit og detaljeringsnivå
• Avklarte roller for samhandling og datadeling mellom forvaltningsnivåa
• Berekraftig geodataforvaltning gjennom nasjonale fellesløysingar

Eit viktig arbeid i planperioden er å beskriva korleis partane skal nå måla.

Organisering av arbeidet

Noreg digitalt-samarbeidet i regionen er organisert med eit fylkesgeodatautval (FGU), basisgeodatautval (BU) og eit plan- og temadatautval (PTU). Underutvala kan oppretta arbeidsgrupper og forum etter behov.

Informasjon om utvala finn du under i faktaboksen om Noreg digitalt i Vestland.