CPOS oppgradert med støtte for Beidou
Kartverket si posisjonsteneste CPOS har no fått full støtte for Beidou-satellittar. Resultatet er meir robuste målingar, særleg i skog og andre område der det er avgrensa sikt til himmelen.
Dei siste åra har Kartverket gjennomført ei omfattande oppgradering av infrastrukturen bak CPOS. Sidan 2022 er GNSS-mottakarane på dei om lag 300 referansestasjonane i nettet skifta ut. Dei nye mottakarane støttar Beidou fullt ut.
No er arbeidet fullført, og CPOS kan nytte alle dei globale satellittnavigasjonssystema som er tilgjengelege i dag.
Samstundes har Kartverket oppgradert systema for handtering av sanntidsdata og programvara som produserer CPOS-tenesta. Dermed kan tenesta ta i bruk fleire satellittar og signal enn tidlegare.
Stort løft for posisjonstenestene
– Dette har vore eit stort og viktig løft for posisjonstenestene våre, seier Tor-Ole Dahlø, produkteigar for posisjonstenestene i Kartverket. Han har hatt med seg teamleiar og senioringeniør Jonas Thorsen i arbeidet.
– Kartverket sitt feltteam har skifta ut mottakarar på rundt 300 referansestasjonar, og vi har oppgradert fleire sentrale IT-system. Arbeidet har vore omfattande, men gevinsten er at brukarane får ei endå meir robust og framtidsretta teneste.
Betre målingar i krevjande terreng
Ein av dei som har etterspurt betre støtte for fleire satellittar, og som dessutan har vore pilotbrukar av den oppgraderte tenesta, er Morten Strand i Domstoladministrasjonen.
– Jordskifterettane måler ofte i tett skog, der det kan vere utfordrande både å få ein posisjon og å oppnå nødvendig nøyaktigheit. Fleire satellittar og signal gjer ein stor skilnad i praksis. Derfor er denne oppgraderinga svært viktig for oss, seier Strand.
Ny HREF-modell i CPOS
Den nye HREF-modellen for NN2000:2025, som vart lansert 14. oktober 2026, er no også tilgjengeleg i CPOS.
HREF-meldingar er lagde til som eigne transformasjonsmeldingar på tilgangspunktet CPOSRTCM32. Brukarane kan dermed velje å nytte desse i staden for ein lokal høgdereferansemodell på måleutstyret.
Kartverket vil samstundes forenkle tilbodet av HREF-tenester i CPOS. Framover blir det berre den nyaste HREF-modellen som blir tilbydd.
Det betyr at tilgangspunktet HREFNN2000, som tilbyr HREF-meldingar for NN2000 frå 2018, blir avvikla midt i januar 2027.
Fakta
Kva er CPOS?
CPOS er ei satellittbasert posisjonsteneste som kan gi brukarane posisjonsinformasjon med nøyaktigheit heilt ned på centimeternivå.
Tenesta er retta mot profesjonelle aktørar og tilbyr korreksjonar for alle dei globale satellittnavigasjonssystema (GPS, GLONASS, Galileo og Beidou). CPOS har no om lag 5500 brukarar.
The mail has been sent!